Արցախի Մաճկալաշենում թռչնաֆաբրիկա կկառուցվի. ծրագրի արժեքը 271 միլիոն դրամ է: Գյուղի 50 ընտանիքներից յուրաքանչյուրին կտրվի 300 հավ։ Ծրագիրը իրագործվելու է Արցախի կառավարության ֆինասավորմամբ՝ «Նավասարդ Ագրո» ընկերության հետ միասին։ Ընկերությունը գյուղացիներին կաջակցի խորհրդատվությամբ, ձուն կգնի ու կհանի դրսի շուկա։ Առաջին խմբաքանակը կվաճառվի դեկտեմբերին։ Մի քանի օրից Արցախի Մաճկալաշեն գյուղում ակտիվ շինարարություն կսկսվի․ թռչնաֆաբրիկա են կառուցելու։ Ծրագիրն իրականացնում է Արցախի կառավարությունը՝ մասնավոր «Նավասարդ Ագրո» ընկերության հետ միասին։ Ընկերության գործադիր տնօրեն Արմինե Մելքոնյանը «Ռադիոլուր»-ին պատմեց, որ պատերազմից առաջ պատրաստվում էին այս ծրագիրն իրականացնել Արցախի այլ բնակավայրերում։ Պատերազմից հետո որոշեցին ներդրում անել սահմանամերձ դարձած Մաճկալաշենում․ «Ավելի վաղ մշակված ծրագիր էր։ Որոշել էինք սեպտեմբերին ներկայացնել Արցախի կառավարությանը։ Այն ժամանակ մտածում էինք ծրագիրն իրականացնել դեպի Հադրութ գնացող հատվածում ու Քարվաճառում։ Քարվաճառում շատ էինք ուզում, քանի որ Գեղարքունիքի մարզին ավելի մոտ էր, իսկ «Նավասարդ Ագրո» ընկերությունը գործում է Գեղարքունիքում։ Պատերազմից հետո, երբ Արցախը կոտրված է, թևաթափ, մեկ օր անգամ չպետք է հետաձգել գաղափարը։ Պետք է այն կյանքի կոչել այսօրվա Արցախում, հենց սահմանապահ գյուղը պահելու համար»,–ասում է Արմինե Մելքոնյանը։ Ավանդական թռչնաբուծությունը իրականացվելու է արդի տեխնոլոգիաներով։ Ներդրվող մոդելի հեղինակը «Նավասարդ Ագրո» ընկերությունն է։ «Փոքր բիզնես մոդել է։ Նախկին խորհրդային տարիների համախմբվածության մոդելն է, արդեն առանձնացված, բայց մեկ հարկի տակ։ Այսինքն, այդ 50 ընտանիքը մեկ հարկի տակ են վարելու իրենց տնտեսությունը, և նրանց տարածքը առաձնացվելու է մեկ ցանկապատով»։ Ծրագրի արժեքը 271 մլն դրամ ։Թռչնաբուծարանի շինարարությունը կտևի երեք ամիս։ Ընկերությունը գյուղացիներին կաջակցի խորհրդատվությամբ, ձուն կգնի ու կիրացնի դրսի շուկաներում։ Որպեսզի ձուն ունենա նույն համային հատկանիշները, կերը պետք է գնեն հենց ընկերությունից, շուկայականից անհամեմատ ցածր գնով։ Արմինե Մելքոնյան․ «Գյուղացուն անվերադարձ տրվում է 300 հավ։ Ամենածախսատարը ժամանակային առումով հավիկների տակը մաքրելն։ Այս դեպքում դրա անհրաժեշտությունը չկա։ Ուղիղ 3 տարի հավերի տակը չի մաքրվում, քանի որ հատուկ խոտածածկույթի մեջ խառնվում է բակտերիա, որը երեք տարի աշխատում է»,–ասում է Արմինե Մելքոնյանը։ «Մեկ ընտանիքի հաշվով ամսական մոտ 150 հազար եկամուտ է ակնկալվում։ Սահմանային գյուղի բնակչի համար սա փոքր գումար չէ»,-ասում է Մաճկալաշենի գյուղապետ Լեռնիկ Ալեքսանյանը․ «Արոտավայրերը, վարելահողերը այժմ թշնամու տիրապետության տակ են․ սա մի միջոց է, որով գյուղացին կարող է իր օրվա հացը վաստակել»։ Մաճկալաշենում արտադրվող ձուն դուրս կբերվի շուկա դեկտեմբերին։ «Նավասարդ Ագրո»-ի գործադիր տնօրենը նշում է՝ սպառողը կտեղեկացվի, որ ձուն արտադրվել է Արցախում։ «Մենք գերնպատակ ունենք՝ դրսում ցույց տալ, որ Արցախը կա, արցախցուն էլ, որ հայությունն իր կողքին է»-ասում է Արմինե Մելքոնյանը։ Նյութը ՝ Հանրային ռադիո
