Թռչնագրիպի բարձր ախտածին շտամի տարածման վտանգի աճը ստիպել է Մեծ Բրիտանիայի իշխանություններին խստացնել թռչնաբուծական տնտեսությունների նկատմամբ վերահսկողությունը։ Նոյեմբերի 13-ից Անգլիայում ուժի մեջ կմտնի թռչուններին փակ տարածքներում պահելու համազգային պարտադիր կարգը։

Մեծ Բրիտանիայի շրջակա միջավայրի, սննդի և գյուղատնտեսության դեպարտամենտի՝ DEFRA-ի նոյեմբերի 11-ի հայտարարության համաձայն՝ նոր սահմանափակումները կվերաբերեն 50 և ավելի թռչուն պահող տնտեսություններին։ Պահանջը կտարածվի նաև ավելի փոքր տնտեսությունների վրա, եթե դրանք վաճառում կամ անհատույց տրամադրում են ձու, թռչնամիս, թռչնաբուծական արտադրանք կամ կենդանի թռչուններ։

Որոշ հատուկ դեպքերի համար նախատեսված են բացառություններ։

Կենսաանվտանգության խստացված պահանջներ

Թռչնագրիպի կանխարգելման գոտի է հայտարարվել ամբողջ Անգլիայում։ Կենսաանվտանգության պարտադիր կանոնները վերաբերում են բոլոր թռչնապահներին՝ անկախ տնտեսության չափից, այդ թվում՝ տնային պայմաններում թռչուն պահողներին։

Պահանջների թվում են՝

- հագուստի, կոշիկի, սարքավորումների և տրանսպորտային միջոցների մաքրում ու ախտահանում,
- թռչունների կերի և ջրի պաշտպանություն վայրի թռչունների հետ շփումից,
- թռչնանոցների պարբերական մաքրում և ախտահանում,
- կրծողների դեմ պայքար,
- մարդկանց և տրանսպորտի անհարկի տեղաշարժերի սահմանափակում,
- ձվատվության փոփոխությունների մշտադիտարկում և համապատասխան գրանցումների վարում։

Իշխանությունները հորդորում են թռչնաբույծներին հիվանդության կասկածելի նշանների դեպքում անհապաղ տեղեկացնել անասնաբուժական համապատասխան մարմիններին։

Ինչո՞վ է պայմանավորված սահմանափակումների խստացումը

Որոշման պատճառը տնային և վայրի թռչունների շրջանում բարձր ախտածին թռչնագրիպի հաստատված դեպքերի աճն է։ Մասնավորապես, նոյեմբերի 9-ին H5N1 շտամը հաստատվել էր Նորֆոլկի կոմսության առևտրային թռչնաբուծական տնտեսությունում։ Ավելի վաղ՝ նոյեմբերի 7-ին, դեպքեր էին արձանագրվել Լանկաշիրում և Յորքշիրում։

Վարակված տնտեսություններում հիվանդության տարածումը կանխելու նպատակով իրականացվում են թռչունների ոչնչացման և սահմանափակման գոտիների սահմանման միջոցառումներ։

Միևնույն ժամանակ, Մեծ Բրիտանիայի իշխանությունները նշում են, որ ներկայումս թռչնագրիպի վտանգը մարդկանց առողջության համար գնահատվում է որպես շատ ցածր։ Սննդամթերքի անվտանգության մարմինը նաև հաստատում է, որ պատշաճ ջերմային մշակման ենթարկված թռչնամիսն ու ձուն անվտանգ են օգտագործման համար։

Անգլիայում սահմանափակումների նպատակն է նվազեցնել վայրի թռչուններից տնային թռչուններին վարակի փոխանցման հավանականությունը և պաշտպանել թռչնաբուծական տնտեսությունները հնարավոր տնտեսական կորուստներից։