Հայաստանում առաջարկվում է ստեղծել վերականգնողական գյուղատնտեսության զարգացմանը միտված մասնագիտական ցանց, որը կմիավորի այս ուղղությամբ հետաքրքրված ֆերմերներին և կազմակերպություններին։

Նախաձեռնության հեղինակը «Safe Agro» ընկերության հիմնադիր, սիրիահայ ագրոնոմ Նարեկ Գարեգինյանն է։ BusinessDaily-ին տված հարցազրույցում նա նշել է, որ Հայաստանում վերականգնողական գյուղատնտեսության թեման դեռևս բավարար ուշադրության չի արժանանում, և անհրաժեշտ է համախմբել ոլորտով հետաքրքրված մարդկանց՝ փորձի փոխանակման ու համագործակցության համար։

Վերականգնողական գյուղատնտեսությունը հողերի առողջության և բերրիության վերականգնմանն ուղղված մեթոդների ամբողջություն է։ Դրա հիմնական մոտեցումներից են հողի նվազագույն մշակումը, մշտական բուսածածկի պահպանումը, մշակաբույսերի բազմազանեցումը և անասնապահության ինտեգրումը։

Գարեգինյանի խոսքով՝ «Safe Agro»-ն Սիրիայում զբաղվում է պարարտանյութերի և հավի մսի արտադրությամբ՝ կիրառելով վերականգնողական գյուղատնտեսության համապատասխան չափորոշիչներ։ Ընկերությունը նախատեսում է նման արտադրություն սկսել նաև Հայաստանում։

Նախաձեռնության շրջանակում մեթոդները փորձարկվում են 10 հեկտար տարածքում։ Ընկերության նպատակն է ստեղծել հարթակ, որտեղ ֆերմերներն ու կազմակերպությունները կկարողանան միավորել փորձն ու ռեսուրսները՝ հողերի վերականգնմանն ուղղված գործելակերպերը զարգացնելու համար։

Վերականգնողական գյուղատնտեսության զարգացումը կարող է նոր հնարավորություններ ստեղծել Հայաստանի գյուղատնտեսության համար՝ հատկապես հողի բերրիության պահպանման, բնական ռեսուրսների արդյունավետ օգտագործման և արտադրության երկարաժամկետ կայունության տեսանկյունից։