Հայաստանի երկու մարզերում՝ Գեղարքունիքում և Վայոց ձորում, անցկացվել են պտղատու այգիների հետբերքահավաքային և ուշ աշնանային խնամքին նվիրված դասընթացներ։ «Շեն» հասարակական կազմակերպության և «Սյունիք-Դևելոփմենթ» ՀԿ-ի իրականացրած ծրագրի շրջանակում մասնակիցներին ներկայացվել են այգիների նախապատրաստման հիմնական աշխատանքները։
Հոկտեմբերի 29-ին դասընթացն անցկացվել է Գեղարքունիքի մարզի Վարդենիսում՝ տեղահանված տնտեսությունների համար, իսկ նոյեմբերի 2-ին՝ Վայոց ձորի մարզի Եղեգնաձորում՝ ծրագրի շահառու տնտեսությունների մասնակցությամբ։
Երկու հանդիպումներին ընդհանուր առմամբ մասնակցել է 33 ֆերմեր։ Բոլոր մասնակիցներին տրամադրվել են տեղեկատվական թերթիկներ և մեթոդական ուղեցույցներ։
Քննարկվել են նաև օրգանական պարարտանյութերի պատրաստման եղանակները
Եղեգնաձորում դասընթացից հետո առանձին քննարկում է անցկացվել գյուղատնտեսական տնտեսություններում առաջացող թափոններից օրգանական պարարտանյութեր պատրաստելու և դրանք կիրառելու վերաբերյալ։
Մասնակիցները քննարկել են նաև ծառերի բների ներկման նյութի ինքնուրույն պատրաստման և կիրառման հարցերը։
Այս մոտեցումները կարևոր են այգիների խնամքի ծախսերը կառավարելու և տնտեսություններում առկա օրգանական մնացորդներն արդյունավետ օգտագործելու տեսանկյունից։
Ինչու է կարևոր այգիների աշնանային խնամքը
Բերքահավաքից հետո այգիներում շարունակվում են հաջորդ սեզոնի նախապատրաստական աշխատանքները։ Դրանց ճիշտ կազմակերպումը կարևոր է ծառերի առողջությունը պահպանելու, այգու սանիտարական վիճակը բարելավելու և գարնանային աշխատանքներին պատրաստ լինելու համար։
Աշնանային խնամքը ներառում է այգու վիճակի գնահատում, անհրաժեշտ սանիտարական աշխատանքներ և ծառերի ձմեռման նախապատրաստում։ Այդ աշխատանքները պետք է կազմակերպվեն՝ հաշվի առնելով ծառատեսակը, տեղանքի կլիմայական պայմաններն ու այգու առողջական վիճակը։
«Շեն» ՀԿ-ի և «Սյունիք-Դևելոփմենթ» ՀԿ-ի նախաձեռնությունն իրականացվում է «Այգեգործության շուկայի զարգացման ծրագիր» (HMDP) շրջանակում, որն ընդգրկում է Գեղարքունիքի և Վայոց ձորի մարզերը։
Ծրագրի նման դասընթացները հնարավորություն են տալիս ֆերմերներին ձեռք բերել գործնական գիտելիքներ և ավելի արդյունավետ կազմակերպել այգիների խնամքը։