Ողջունելով միջոցառման մասնակիցներին՝ Արման Խոջոյանը նշել է․ «Լոգիստիկ ենթակառուցվածքների սահմանափակ լինելու կամ բացակայության պայմաններում Հայաստանի ֆերմերային տնտեսությունների փոքր ծավալները խոչընդոտ են հանդիսանում նրանց արտադրանքի իրացման, այդ թվում՝  արտահանումների համար։ Վստահ եմ, որ անհրաժեշտ ենթակառուցվածքների առկայության և արտահանումների ճիշտ կազմակերպման դեպքում ոչ միայն տեղական ֆերմերներին, այլև արտահանող և ներմուծող ընկերություններին հնարավորություն կընձեռվի ավելի արդյունավետ գործունեություն իրականացնել և հասնել շոշափելի արդյունքների»:

Իր խոսքում փոխնախարարն ընդգծել է ՀՀ էկոնոմիկայի նախարարության և ՀՀ կառավարության պատրաստակամությունը օժանդակություն ցուցաբերել շահագրգիռ կողմերին համագործակցության բոլոր փուլերում:

Այնուհետև ռուսաստանյան ընկերությանը հակիրճ ներկայացվել են ՀՀ գյուղատնտեսության և ագրոարդյունաբերական համալիրի առաջնահերթություններն ու զարգացման հիմնական միտումները, ինչպես նաև Հայաստանում տնտեսվարողներին տրամադրվող պետական օժանդակության գործիքակազմը և ՀՀ գյուղատնտեսության ոլորտում իրականացվող աջակցության ծրագրերը։

Իրենց հերթին X5 Retail Group ընկերության ներկայացուցիչները նշել են, որ ռուսաստանյան շուկայում առկա է բավական մեծ հետաքրքրվածություն հայկական արտադրության սննդամթերքի նկատմամբ։ Նրանց տեղեկացմամբ՝ ընկերության առաջնային նպատակն է երկարաժամկետ համագործակցություն ծավալել անմիջապես հայ արտադրողների հետ՝ հայկական արտադրանքի ներկայացվածությունն իրենց առևտրային ցանցերում ընդլայնելու նպատակով։

Ընկերությունը մեծ հետաքրքրություն է ցուցաբերել հատկապես հայկական թարմ միրգ-բանջարեղենի, պահածոյացված արտադրանքի, գինիների ու չրերի  նկատմամբ։

Այնուհետև կողմերը քննարկել են ռուսաստանյան շուկայի առանձնահատկություններին, գործող մրցակցային պայմաններին ու հայկական գյուղատնտեսական արտադրանքի արտահանման համար առավել նպատակահարմար ուղղություններին վերաբերող հարցեր։

Հանդիպման ընթացքում քննարկվել են փոխշահավետ համագործակցությանն ուղղված մի շարք հարցեր։ Պայմանավորվածություն է ձեռք բերվել հավաքագրել և ուսումնասիրել բոլոր բարձրացված հարցերը՝ առաջիկայում գործնական քայլեր ձեռնարկելու նպատակով։