Արմավիրում  ծիրանը քիչ կլինի

Նույն պատկերն է նաև հարևան Արմավիրի մարզում. այստեղ ևս սպասվող ծիրանի բերքն առատ չի լինի:
Արմավիրի մարզպետարանի գյուղատնտեսության և բնապահպանության վարչության պետ Արթուր Այվազյանի տեղեկացմամբ՝  գարնանը գրանցված ցրտահարությունից ծիրանենին տուժել է:
Մարզում մոտ 5000 հեկտար ծիրանի այգի կա, որից 3800-ը՝ բերքատու, բայց այսքանն էլ բերքի  բարձր ցուցանիշ չեն ապահովի:
«Անցյալ տարի ևս ծիրանենու բերքը պակաս էր, այս տարի հնարավոր է, որ նախորդ տարվանից էլ պակաս ծիրանի բերք ստանանք: Ցուցանիշը 50 տոկոսով նվազ կլինի»,- մանրամասնեց մարզպետարանի ներկայացուցիչը:
Արմավիրի մարզում միայն ծիրանը պակաս չի լինի, սալորն էլ քիչ կլինի:
Արմավիրի մարզի գլխավոր գյուղատնտեսը, սակայն, վստահեցրեց, որ փոխարենն առատ դեղձ կունենանք: Խաղողի բերքի միայն գինու պատրաստման տեսակներն են լավ պտղավորվել:

«Դեգրես»՝ գյուղատնտեսությունում

Հայաստանում այս տարի ծիրանի միջին բերք է սպասվում: Իր հերթին արձանագրեց «Ագրարագյուղացիական միավորում» ՀԿ նախագահ Հրաչ Բերբերյանը:
Նա դեռ հստակ հաշվարկները չունի, թե ինչքան ծիրան կլինի, բայց պնդում է, որ նախորդ տարվանից այն քիչ է:
 Իսկ պատճառները, ըստ փորձագետի, մի քանիսն են:
«Այս սեզոնին այգիների փոշոտումը լավ չի կատարվել: Վերջին  մի քանի տարվա ընթացքոմ փոշոտման հետ կապված խնդիրներ են առաջանում մեղուների քանակի նվազման հետևանքով: Մեղուներն անկում են ապրում, որն իր հետևանքներն է թողնում նաև փոշոտման վրա: Բացի այս, գարնանը պտուղը նաև ցրտահարվել է»,- նկատեց նա:
Վերջին տասնօրյակում կարկուտը չշրջանցեց Արարատյան դաշտը: Հատկապես Արարատի և Արմավիրի մարզերում տեղացած կարկուտը վնասներ է հասցրել պտղատուներին: Այգեգործները Բերբերյանին հայտնել են, որ  ծիրանենու բերքը վնասվել է: Ըստ նրանց՝ կան հատվածներ, որտեղ վնասի չափը  50 տոկոսի  է հասնում:
«Կարկտահարության հետևանքով բերքն ապրանքային տեսքը կորցրել է՝ արտահանման համար պիտանի չի լինի»,- հավելեց նա:
Ագրարագյուղացիական միավորման նախագահի կարծիքով՝ վերջին երեք տարվա ընթացում գյուղատնտեսությունն անկում՝ «դեգրես» է ապրել: Նրա դիտարկմամբ՝ ծիրանի այգիները ևս կրճատվել են:
 Ի դեպ,  հանրապետությունում սպասվող ծիրանի բերքի վերաբերյալ փորձեցինք տեղեկություն ստանալ նաև Էկոնոմիկայի նախարարությունից: Գերատեսչությունից փոխանցեցին, որ հարցին կարող են պատասխանել միայն գրավոր և համապատասխան հարցում պահանջեցին:

Հեղինակ՝ Մանյա Պողոսյան